យោងតាមរបាយការណ៍ពីប្រទេសបារាំងបានឱ្យដឹងថា Manchester United កំពុងពិភាក្សាគ្នាដើម្បីចុះហត្ថលេខាលើ Neymar ពីក្លិប Paris Saint-Germain នៅរដូវក្តៅនេះ។
ការសែតបារាំង L’Equipe រាយការណ៍ថាក្លឹបជាច្រើននៅ Premier League បានចរចាជាមួយ PSG ជុំវិញការនាំយកតារាប្រេស៊ីល ហើយការពិភាក្សាជាមួយបីសាចក្រហម Man United គឺមានសភាពស្រួចស្រាលជាងគេ។ ស្របពេលជាមួយគ្នានេះ ក្រុមដែលកក់កៅអីការប្រកួតក្របខណ្ឌ Champions League ជាលើកដំបូងរបស់ពួកគេ ក្រោយខកខាន ២០ឆ្នាំកន្លងមក Newcastle ត្រូវបានគេរាយការណ៍ថា ក៏ជាក្លឹបមួយដែលចង់បាន Neymar មកលេងនៅអង់គ្លេសផងដែរ។
PSG បើកចំហរក្នុងការលក់កីឡាករវ័យ ៣១ ឆ្នាំខាងលើនៅរដូវក្តៅនេះ ហើយ Neymar កំពុងពិចារណាយ៉ាងខ្លាំងក្នុងការចាកចេញពីប្រទេសបារាំង ចំពេលរូបគេ និងមិត្តរួមក្រុម Lionel Messi បានក្លាយជាគោលដៅសម្រាប់ការរិះគន់ពីសំណាក់អ្នកគាំទ្រក្លឹប PSG ម្ដងហើយម្ដងទៀត។
ជាមួយគ្នានេះ Casemiro ដែលជាមិត្តរួមជម្រើសជាតិប្រេស៊ីលរបស់ Neymar កំពុងជំរុញឱ្យ Man United នាំយកអតីតកីឡាករ Barcelona រូបនេះ មកកាន់ក្រុមរបស់លោក Erik ten Hag ។ បិសាចក្រហមចង់ចុះហត្ថលេខាលើ Neymar ក្នុងលក្ខខ័ណ្ឌខ្ចីជើងសម្រាប់រដូវកាលក្រោយ ប៉ុន្តែភាគីបារាំងចង់លក់ Neymar ក្នុងកិច្ចសន្យាអចិន្ត្រៃយ៍តែម្ដង។
ជាការពិតណាស់ Neymar សម្រេចចាកចេញពីក្លិប Barcelona កាលពីឆ្នាំ២០១៧ ផ្លាស់ទៅកាន់ PSG ក្នុងតម្លៃបំបែកកំណត់ត្រាពិភពលោក ២២២លានអឺរ៉ូ ដើម្បីចាកចេញពីស្រមោល Messi ក្នុងគោលបំណងក្លាយជាកីឡាករកំពូល និងឈ្នះពានរង្វាន់ផ្សេងៗទាំងជាមួយក្លិប និងឈ្នះពានរង្វាន់ផ្ទាល់ខ្លួន។ ប៉ុន្តែអ្វីៗវាមិនដូចការរំពឹងទុកនោះទេ Neymar មិនអាចបង្ហាញភាពលេចធ្លោខ្លាំងនៅលើទឹកដីបារាំង ស្របពេលនៅក្រោមឥទ្ធិពលតារាវ័យក្មេង Kylian Mbappé ខណៈបច្ចុប្បន្ន Messi ក៏មកចូលរួមជាមួយខ្លួនថែមទៀតផង។
ការចាកចេញពី PSG អាចជាជម្រើសដ៏ល្អបំផុតមួយសម្រាប់ Neymar ក្នុងស្វែងរកភាពជ័យរបស់ខ្លួនសារជាថ្មី ខណៈទឹកដីអង់គ្លេសអាចជាទីកន្លែងដ៏ស័ក្តិសមបំផុតសម្រាប់ឱកាសធ្វើឱ្យខ្លួនលេចធ្លោម្ដងទៀត។ អំឡុងពេលនៅ PSG រហូតមកដល់ពេលនេះ Neymar មិនទាន់ឈ្នះពានរង្វាន់អន្តរជាតិនៅឡើយនោះទេ ដោយតែងតែបរាជ័យនៅពានលំដាប់កំពូលអឺរ៉ុបជារៀងរាល់រដូវកាល។ ស្របពេល Man Utd Chelsea និង Newcastle អាចនឹងជួយឱ្យតារាប្រេស៊ីលរូបជួបអាជីពស្រស់ថ្លាឡើងវិញ៕ព័ត៌មានកីឡាបាល់ទាត់ថ្មីៗ
