យោងតាម Cesar Luis Merlo បានឱ្យដឹងថា ក្លិបមួយរបស់អារ៉ាប៊ីសាអូឌីតបានផ្តល់សំណើរដល់ខ្សែប្រយុទ្ធ Lautaro Martinez របស់ក្លិប Inter Milan ក្នុងតម្លៃ ២៤០ លានអឺរ៉ូ ដើម្បីចូលរួមជាមួយពួកគេ។
ក្លឹបអារ៉ាប៊ីសាអូឌីត បាននិងកំពុងបង្កើនការទាក់ទាញកីឡាករល្បីៗពីទ្វីបអឺរ៉ុប ហើយខ្សែប្រយុទ្ធកណ្តាលអាហ្សង់ទីនខាងលើ គឺជាការបង្ហាញខ្លួនចុងក្រោយបំផុតនៅលើរ៉ាដាផ្ទេររបស់ពួកគេ។ ក្លិបដែលមិនបញ្ចេញឈ្មោះមួយ បានផ្តល់ឱ្យគាត់នូវកិច្ចសន្យារយៈពេល ៤ ឆ្នាំដើម្បីរកប្រាក់បានជាង ៦០ លានអឺរ៉ូក្នុងមួយរដូវកាល ក្នុងអំឡុងពេលប្រកបអាជីពនៅមជ្ឈិមបូព៌ា ពោលគឺរកបានជាង ២៤០លានអឺរ៉ូក្នុងរយៈពេល ៤ឆ្នាំនោះ ប៉ុន្តែ Martinez មិនដឹងថានឹងទទួលយកសំណើរនេះឬក៏អត់នោះទេ។
Martinez បានក្លាយជាខ្សែប្រយុទ្ធកណ្តាលដ៏ល្អបំផុតម្នាក់នៅអឺរ៉ុប ចាប់តាំងពីផ្លាស់ពីប្រទេសកំណើតអាហ្សង់ទីនរបស់គាត់ទៅកាន់ប្រទេសអ៊ីតាលី។ កាលពីរដូវកាលមុន Martinez រកបាន ២១ គ្រាប់ក្នុងការបង្ហាញខ្លួន ៣៨ ប្រកួតនៅ Serie A ដើម្បីជួយឱ្យក្រុមរបស់គាត់បញ្ចប់ក្នុងចំណាត់ថ្នាក់លេខ ៣ នៅក្របខណ្ឌ Serie A។ ដូចគ្នានេះផងដែរ Martinez បានជួយឱ្យ Inter ឈ្នះពានរង្វាន់ Coppa Italia និង Supercoppa Italiana។
លើសពីនេះ Inter Milan បានឈានដល់វគ្គផ្តាច់ព្រ័ត្រនៃពានរង្វាន់ UEFA Champions League ហើយកីឡាករវ័យ ២៥ ឆ្នាំខាងលើបានស៊ុតបញ្ចូលទីបាន ៣ គ្រាប់ និង assist ៣ ដងនៅពានអឺរ៉ុបមួយនេះ។ រដូវកាល២០២២/២៣ នេះ ចាត់ទុកជារដូវកាលដ៏អស្ចារ្យបំផុតនៅក្នុងអាជីពរបស់ Martinez ដោយរូបគេបានជួយឱ្យអាហ្សង់ទីនលើកពាន FIFA World Cup ឆ្នាំ ២០២២ នៅប្រទេសកាតា។
បើតាមប្រភពបានបានអះអាងថា នៅពេលនេះមិនមានការបង្ហាញណាមួយដែលនិយាយថា Martinez នឹងទទួលយកសំណើរបស់អារ៉ាប៊ីសាអូឌីតនោះទេ ប៉ុន្តែប្រាក់ដ៏ច្រើនសន្ធឹកសន្ធាប់កំពុងលួងលោមតារាឆ្នើមរូបនេះ។ ជាក់ស្ដែងយើងបានឃើញរួចហើយ កីឡាករលំដាប់កំពូលជាច្រើនគេចមិនផុតពីការផ្ដល់ជូនប្រាក់ខែដ៏ច្រើនមហិមា ពីក្លិបអារ៉ាប៊ីសាអូឌីតនោះឡើយ ដូចជា Cristiano Ronaldo, Karim Benzema និងកីឡាករល្បីៗជាច្រើនផ្សេងទៀត៕ព័ត៌មានកីឡាបាល់ទាត់ថ្មីៗ
