ក្រោយលើកពាន Ligue 1 នារដូវកាលនេះ Lionel Messi បានក្លាយជាកីឡាករដែលឈ្នះពានច្រើនបំផុតក្នុងប្រវត្តិសាស្ត្របាល់ទាត់ ដោយតាមស្មើ Dani Alves ដែលឈ្នះចំនួន ៤៣ពាននៅក្នុងអាជីព។
Lionel Messi បានឈ្នះពានរង្វាន់អាជីពជាលើកទី៤៣ របស់គាត់កាលពីថ្ងៃសៅរ៍ជាមួយនឹងការឈ្នះរបស់ PSG ទល់នឹង Strasbourg នៅថ្ងៃចុងក្រោយនៃការប្រកួតក្របខណ្ឌ Ligue 1 ។ ខណៈគាត់តាមស្មើនឹងអតីតមិត្តរួមក្រុម Barcelona របស់គាត់ គឺខ្សែការពារ Dani Alves ដែលកំពុងជាប់នៅក្នុងពន្ធនាគារ។
វាជាពានទីបីរបស់គេនៅក្នុងប្រទេសបារាំង បន្ទាប់ពីពាន Ligue 1 កាលពីឆ្នាំមុន និង French Super Cup នៅដើមរដូវកាល។ ការឈ្នះពានរង្វាន់នេះទំនងជាពានរង្វាន់ចុងក្រោយរបស់គាត់ នៅក្នុងទីក្រុងប៉ារីស ក្រោយមានប្រភពច្បាស់ការណ៍ជាច្រើននិយាយថា Messi នឹងចាកចេញពី PSG ដូច្នេះគាត់នឹងមិនឈ្នះ ‘Coupe de France’ ជាមួយ PSG ឡើយ។
២០២២-២៣នេះជាឆ្នាំដ៏អស្ចារ្យបំផុតនៅក្នុងជីវិតរបស់ Messi ដោយជាមួយអាហ្សង់ទីន Messi បានឈ្នះពានរង្វាន់ក្នុងក្ដីស្រមៃ FIFA World Cup កាលពីចុងឆ្នាំ២០២២ រួមជាមួយពានរង្វាន់ផ្សេងៗទៀតដូចជា ‘Finalissima’ ឆ្នាំ២០២២, Copa America ២០២១, មេដាយមាសអូឡាំពិកពី Pekin ក្នុងឆ្នាំ ២០០៨ ក៏ដូចជាជើងឯក World Cup U20 ឆ្នាំ២០០៥។
ចំណែកឯនៅជាមួយក្លិប Messi បានឈ្នះជាច្រើនជាមួយអតីតក្លិប Barcelona របស់គាត់ ដោយឈ្នះពានសរុបចំនួន ៣៥ពាន។ ក្នុងចំណោមនោះ ១០ពានគឺជាការឈ្នះពានរង្វាន់ La Liga ចន្លោះឆ្នាំ ២០០៥ ដល់ឆ្នាំ២០១៩ និងពានរង្វាន់ Champions League ចំនួន ៤ដង (២០០៦, ២០០៩, ២០១១, ២០១៥)។ ក្រៅពីនោះមានពាន Spanish Super Cup ចំនួន ៨លើក, ពាន Copa del Reys ៧ ដង, Club World Cup ៣ ដង និង UEFA Super Cup ចំនួន ៣ លើក។
នេះមិនមែនជាកំណត់ត្រាតែមួយគត់ដែល Messi ធ្វើបានអំឡុងពេលឈ្នះពានជាមួយ PSG នោះទេ ខណៈគាត់ក៏បានបំបែកកំណត់ត្រាថ្មីផ្សេងទៀតផងដែរ។ តាមរយៈការស៊ុតបញ្ចូលទីបានមួយគ្រាប់ក្នុងការឈ្នះពានលើកទី ១១ របស់ PSG កំពូលខ្សែប្រយុទ្ធវ័យ ៣៥ឆ្នាំខាងលើ បានវ៉ាដាច់គូសត្រូវចាស់វស្សា Cristiano Ronaldo ជាផ្លូវការហើយ ដោយបានក្លាយជាអ្នកស៊ុតបញ្ចូលទីច្រើនជាងគេក្នុងលីគកំពូលយក្សទាំង ៥ ដែលរកបាន ៤៩៦គ្រាប់ ខណៈ Ronaldo រកបាន ៤៩៥គ្រាប់នៅក្នុងអាជីព៕ព័ត៌មានកីឡាបាល់ទាត់ថ្មីៗ
