កីឡាករនីហ្សេរីយ៉ា Odion Ighalo បាននិយាយដោយមិនលាក់លៀមថា ការដែលខ្លួនទៅលេងនៅប្រទេសអារ៉ាប៊ីសាអូឌីត គឺមកពីមូលហេតុតែមួយគត់គឺដើម្បីតែលុយប៉ុណ្ណោះ។
អតីតខ្សែប្រយុទ្ធរបស់ក្លិប Manchester United កីឡាករ Odion Ighalo ដែលបានស៊ុតបញ្ចូលទី ១៩ គ្រាប់ឱ្យក្លិប Al Hilal កាលពីរដូវកាលមុន បាននិយាយថា អ្វីដែលគ្រប់គ្នាគិតច្រើនអំពី Saudi Arabia Pro League គឺលុយ មិនមែនចំណង់ចំណូលចង់លេងបាល់ទាត់នោះទេ។
កីឡាករដែលធ្លាប់លេងនៅលីគតាមបណ្ដាលប្រទេសជាច្រើន រួមទាំងធ្លាប់លេងនៅលីគប្រទេសចិនផងដែរនោះ Ighalo ត្រូវបានដកស្រង់ដោយការសែត Futbol Fichajes ដោយខ្សែប្រយុទ្ធរូបនេះនិយាយថា៖ “យើងលេងគឺដើម្បីតែលុយប៉ុណ្ណោះនៅអារ៉ាប៊ីសាអូឌីត មិនមែនជាចំណង់ចំណូលចិត្តទេ”។ព័ត៌មានកីឡាបាល់ទាត់ថ្មីៗ
Ighalo បានផ្តល់ហេតុផលដូចគ្នានៅពេលសួរថាតើ Cristiano Ronaldo កំពុងធ្វើអ្វីនៅប្រទេសអារ៉ាប៊ីសាអូឌីត។ កីឡាករវ័យ ៣៤ឆ្នាំរូបនេះបានលើកឡើងទៀតថា៖ “Cristiano Ronaldo រកលុយបានច្រើនជាងខ្ញុំ ១០០ ដងឯណោះនៅក្នុងអាជីពរបស់គាត់ ប៉ុន្តែគាត់នៅតែទៅទីនោះ។ តើអ្នកគិតថាគាត់ធ្វើវាសម្រាប់ចំណង់ចំណូលចិត្តទេ? វាគ្រាន់តែដើម្បីលុយប៉ុណ្ណោះ Bro”។
Odion Ighalo បានចូលរួមជាមួយក្លិប Al Hilal កាលពីរដូវកាល២០២២/២៣ ដែលនេះជាក្លិបទី២ របស់គេនៅលីគអារ៉ាប៊ីសាអូឌីត។ ប៉ុន្តែទោះជាយ៉ាងណាក៏ដោយ អតីតកីឡាករធ្លាប់លេងនៅចិនរូបនេះ ហាក់មិនបានជួយក្រុម Al Hilal ទទួលបានជោគជ័យធំដុំនោះទេ ដោយបានត្រឹមលេខ៣ ប៉ុណ្ណោះសម្រាប់ការប្រកួតជើងឯកលីគអារ៉ាប៊ីសាអូឌីត នៅពីក្រោមក្រុម Al-Ittihad និង Al-Nassr។
អ្នកទាំងអស់គ្នាដឹងហើយថា លីគបាល់ទាត់អារ៉ាប៊ីសាអូឌីតកំពុងទទួលបានការចាប់អារម្មណ៍ជាខ្លាំង ពីសំណាក់អ្នកនិយមបាល់ទាត់នៅជុំវិញពិភពលោក។ វាពិតជារឿងគួរឱ្យភ្ញាក់ផ្អើលខ្លាំងណាស់ ដែលលីគបាល់ទាត់នៅតំបន់អាស៊ីមួយនេះ អាចទាក់ទាញកីឡាករល្បីៗលំដាប់ពិភពលោកជាច្រើន មកលេងនៅលីគពួកគេ។ ជាក់ស្ដែងដូចជា Cristiano Ronaldo, Karim Benzema, N’Golo Kanté, Kalidou Koulibaly, អ្នកចាំទី Édouard Mendy រួមនឹងកីឡាករឆ្នើមៗជាច្រើនផ្សេងទៀត។ ប៉ុន្តែរឿងមួយដែលយើងដឹងគ្រប់គ្នានោះគឺ គ្រប់កីឡាករមកលេងនៅអារ៉ាប៊ីសាអូឌីតទាំងអស់ គឺសុទ្ធតែទទួលបានប្រាក់ឈ្នួលដ៏ច្រើនមហាសាល៕
