នៅក្នុងបទសម្ភាសន៍ជាមួយកាសែត ‘Sport’ ប្រធានក្លឹប Barcelona លោក Joan Laporta បាននិយាយថា ក្លឹបកាតាឡានបច្ចុប្បន្នមានក្រុមល្អជាងគូប្រជែងស្លាប់រស់របស់ពួកគេគឺ Real Madrid ទៅទៀត។
និយាយទៅកាន់កាសែតនៅតំបន់ Catalan ‘Sport’ ប្រធានក្លឹប Barcelona លោក Joan Laporta បានសារភាពថា គាត់មិនចាប់អារម្មណ៍នឹងទីផ្សារដោះដូរកីឡាកររដូវក្តៅរបស់ Real Madrid ដោយនិយាយថា Barcelona មានអ្វីដែលខ្លួនចង់បានដើម្បីឈ្នះជើងឯកលីគអេស្ប៉ាញម្តងទៀត នៅរដូវកាលខាងមុខ។
មេធំ Barcelona ខាងលើបាននិយាយថា៖ “យើងមានក្រុមល្អជាង Real Madrid ហើយក្នុងកម្រិតបុគ្គល យើងក៏ល្អជាងគូប្រជែងរបស់យើងដែរ។ ក្នុងនាមជាប្រធាន និងជាអ្នកគាំទ្រ ខ្ញុំពិតជារីករាយជាមួយនឹងក្រុមដែលយើងកំពុងបង្កើតឡើង”។
លោក Laporta បានលើកឡើងទៀតថា៖ “យើងមានក្រុមប្រកួតប្រជែងខ្លាំងរួចទៅហើយ។ យើងបានឈ្នះជើងឯកអេស្ប៉ាញ ហើយយើងអាចបន្តភាពអនុត្តរភាពនោះនៅក្នុងការប្រកួត។ ខ្ញុំផ្តោតលើការកសាងក្រុមដ៏ល្អមួយ។ យើងបាននាំយក Gundogan និង Inigo Martinez រួចហើយ ដែលនឹងនាំមកជូនយើងនូវគុណភាព ប៉ុន្តែនៅមានកិច្ចការផ្សេងទៀតដែលត្រូវធ្វើ។ យើងនៅតែបាត់ខ្សែការពារស្ដាំ និងខ្សែបម្រើពីរនាក់ ហើយខ្ញុំគិតថាយើងមានឱកាសឈ្នះពាន Champions League”។
ជាមួយគ្នានេះ ចំពោះអនាគតរបស់អ្នកចាត់ការលោក Xavi Hernandez ជាមួយក្លិប Barcelona លោក Laporta បាននិយាយថា៖ “គាត់នឹងបន្តកិច្ចសន្យារបស់គាត់នៅពេលដែលក្លឹបយល់ថាវាសមរម្យ”។
គួរឱ្យដឹងផងដែរថា ក្លិប Barcelona បើទោះបីជាជួបបញ្ហាស្មុគស្មាញជាច្រើនយ៉ាងណាក្ដី ប៉ុន្តែពួកគេនៅអាចស្វែងរកក្រុមល្អបំផុតរបស់ពួកគេឡើងវិញ ក្រោមការដឹកនាំរបស់អ្នកចាត់ការលោក Xavi ដោយបានជួយឱ្យក្លិប Barcelona ផ្ដួលគូប្រកួត Real Madrid គ្រងតំណែងជើងឯកអេស្ប៉ាញ La Liga កាលពីរដូវកាលចាស់កន្លងទៅ៕ព័ត៌មានកីឡាបាល់ទាត់ថ្មីៗ
