ខ្សែប្រយុទ្ធក្រុមសិង្ហក្រហមភ្នំពេញក្រោន កីទ្បាករ លឹម ពិសុទ្ធ រំពឹងថាឋ អាចដណ្តើម៣ពិន្ទុពីក្រុមម្ចាស់ផ្ទះ ខណៈដែលកីទ្បាករ រ៉ឹង ប៊ុនហៀង ដែលជាខ្សែប្រយុទ្ធក្រុមវិសាខា ចាត់ទុកថា ជំនួបសប្តាហ៍ទី៥ នាចុងសប្តាហ៍នេះ គឺជាការប្រកួតមួយដ៏តានតឹងបំផុត។ព័ត៌មានកីឡាបាល់ទាត់ថ្មីៗ
មុនជំនួបដ៏ក្ដៅគកុកនៅចុងសប្តាហ៍នេះ កីទ្បាករ លឹម ពិសុទ្ធ របស់ក្រុមភ្នំពេញក្រោន រំពឹងថាអាចដណ្តើម៣ពិន្ទុពីក្រុមម្ចាស់ផ្ទះ ដោយនិយាយថា៖«ជាការពិតណាស់! ពួកគេគឺជាក្រុមអស្ចារ្យមួយនៅក្នុងលីគកំពូលកម្ពុជា ប៉ុន្តែយើងបានឈ្នះពួកគេនៅការប្រកួត៣លើកចុងក្រោយ ដែលជាកម្លាំងចិត្តដ៏សំខាន់ដើម្បីឱ្យយើងយក៣ពិន្ទុសម្រាប់ការប្រកួតនេះ។ វានឹងមិនមែនជាការប្រកួតងាយស្រួលនោះទេសម្រាប់យើង ប៉ុន្តែយើងនឹងធ្វើគ្រប់យ៉ាង ដើម្បីការឈ្នះពួកគេទៀត ជាពិសេសនៅទីនោះ»។ ដោយឡែក កីទ្បាករ រ៉ឹង ប៊ុនហៀង ដែលជាខ្សែប្រយុទ្ធមុតស្រួចក្រុមវិសាខា បានចាត់ទុកជំនួបដ៏ក្ដៅគកុកនេះ ជាការប្រកួតដ៏តានតឹងបំផុត។ រ៉ឹង ប៊ុនហៀង និយាយថា៖«នាចុងសប្តាហ៍នេះ ពួកយើងនឹងត្រូវបើកទ្វារផ្ទះទទួលស្វាមគមន៍ក្រុមភ្នំពេញក្រោន។ ពួកយើង ក៏ត្រៀមខ្លួនបានយ៉ាងល្អ រង់ចាំតែការប្រកួតមកដល់ប៉ុណ្ណោះ ហើយការប្រកួតនេះ ពួកយើងនឹងធ្វើឱ្យបានល្អ និងទទួលបាន៣ពិន្ទុពីក្រុមភ្ញៀវ»។
លោកបន្តថា៖«៤ប្រកួតកន្លងមក ពួកយើងធ្វើបានល្អគួរសម ហើយនៅប្រកួតទី៤ យើងរបូតអស់៣ ពិន្ទុ។ ដូច្នេះ យើងត្រូវរក៣ពិន្ទុឱ្យបាន ដើម្បីឆ្ពោះទៅរកជើងឯក។ ចំពោះជំនួបចុងសប្តាហ៍នេះ ជាការប្រកួតដ៏តានតឹងបំផុត ដោយសារពួកគេជាក្រុមម្ចាស់ជើងឯកចាស់ CPL អ៊ីចឹងហើយវាពិបាកបន្តិច ប៉ុន្តែពួកយើងនៅតែសង្ឃឹមថា អាចទទួលបានជោគជ័យខ្លាំង ដើម្បីផ្ដល់ជូនដល់អ្នកគាំទ្រ។ ខ្ញុំជឿជាក់លើមិត្តរួមក្រុម ក៏ដូចជាគ្រូបង្វឹក ពួកយើងនឹងអាចធ្វើវាបាន»។ គួរជម្រាបថា នៅក្នុងជំនួបដ៏ធំចុងសប្តាហ៍នេះ ក្លឹបអ្នកមានខ្មែរ វិសាខា នឹងបើកទ្វារកីទ្បដ្ឋានព្រីនស៍ ទទួលស្វាគមន៍ក្រុមសិង្ហក្រហមភ្នំពេញក្រោន នាវេលាម៉ោង១៨:០០ល្ងាចថ្ងៃទី១៧ ខែកញ្ញា ឆ្នាំ២០២៣ ខាងមុខនេះ ដើម្បីកំណត់ទ្បើងមកលេខ២ ក្នុងតារាងពិន្ទុ CPL សប្តាហ៍ទី៥ ខណៈដែលក្រុមទាំងពីរមាន៩ពិន្ទុដូចគ្នា ដោយក្រុមភ្នំពេញក្រោនឈរនៅលេខ៣ ហើយក្រុមវិសាខាឈរនៅលេខ២…៕
