ឡើងមកដល់ចំណុចខ្ពស់ គោះទ្វារកាន់ពាន UEFA Champions League ហើយបន្តបន្ទាប់ទៅប៉ុន្មានឆ្នាំក្រោយ ក្លឹបតោខៀវ Chelsea ក៏ស្រាប់តែធ្លាក់ចុះមកវិញ ពោលបន្ទាប់តែការកើតមានវិវាទរុស្ស៊ី-អ៊ុយក្រែន នាំឲ្យតម្រូវដកអតីតម្ចាស់លោក Roman Abramovich និងត្រូវជំនួសចូលដោយម្ចាស់ថ្មី ជាជនជាតិអាមេរិក Todd Boehly។
ឆ្លងកាត់ពេលវេលា ២ ឆ្នាំ រាប់ចាប់តាំងចុងខែឧសភា ឆ្នាំ ២០២១ នៅថ្ងៃដែល Chelsea ស្ថិតក្រោមការដឹកនាំដោយលោក Thomas Tuchel យកឈ្នះ ១-០ ទៅលើក្លឹប Man City នាវគ្គផ្តាច់ព្រ័ត្រ UCL គិតមកទល់បច្ចុប្បន្នកាល ឆ្នាំ ២០២៣ គឺស្ថានភាពក្លឹបហាក់មានការប្រែប្រួល ១៨០ ដឺក្រេ។
នេះទាំងទម្រង់លេងក៏ធ្លាក់ចុះខ្លាំង ការបែកបាក់កីឡាករកំពូលៗក៏បានកើតឡើងជាបន្តបន្ទាប់ត្រឹមរយៈពេលខ្លី។ CTS Sports បង្ហាញបច្ចុប្បន្នភាពចំណោមកីឡាករនៅឈុត ១១ រូប កាលវគ្គដណ្តើមពានសារនោះ៖
អ្នកចាំទី Edouard Mendy – ចេញពីក្លឹប Rennes មករួមរស់នៅ Chelsea ៣ ឆ្នាំ ចុងក្រោយបែរចាកចេញផ្ទេរទៅក្លឹបនៅអារ៉ាប៊ីសាអ៊ូឌីត Al-Ahli ទើបតែសម្រេចការស៊ីញ៉េកុងត្រាថ្មីថ្មោងកាលពីដើមខែ។អានព័ត៌មានកីឡាបាល់ទាត់ប្រចាំថ្ងៃ
ខ្សែការពារ Cesar Azpilicueta – ក៏ជាកីឡាករដែលបានជ្រើសការចាកចេញនៅរដូវក្តៅសារនេះ បន្ទាប់តោខៀវ ធ្លាក់ទៅឈរនៅលេខ ១២ គ្មានកៅអីលេងពានអឺរ៉ុប។ តារាចាស់វស្សា សញ្ជាតិអេស្ប៉ាញបានត្រលប់ទៅប្រទេសកំណើត ចុះចូលនៅក្លឹប Atletico Madrid។
ខ្សែការពារ Thiago Silva – កីឡាករវ័យ ៣៨ ឆ្នាំ តាមថាប៊ិះតែនឹងចាកចេញ តែដោយសារការស៊ីញ៉េបន្តកុងត្រាថ្មីនៅពាក់កណ្តាលរដូវកាល ក៏សម្រេចឲ្យគេបន្តនៅ។ មានរបាយការណ៍ជាច្រើនចុះផ្សាយ គ្មានហេតុផលអ្វីដែលតារាឆ្នើមប្រេស៊ីលនឹងឈរជើងហួសរដូវក្តៅឆ្នាំក្រោយ ២០២៤។
ខ្សែការពារ Antonio Rudiger – មានមតិជាច្រើនលើកឡើង ការចាកចេញរបស់ក្របីព្រៃអាល្លឺម៉ង់គឺជារឿងដ៏ឈឺចាប់បំផុតសម្រាប់ Chelsea ត្រង់ពេលគេឡើងជើង បែរត្រូវចែកផ្លូវទាំងគ្មានតម្លៃខ្លួន ទៅឲ្យ Real Madrid ទល់សព្វថ្ងៃ។
ខ្សែការពារ Reece James – នេះជាកីឡាករទីពីរ ដែលបន្តសេសសល់វត្តមានក្នុងចំណោមអ្នកទាំង ៣។ យុវជនលេងតំណែងស្លាប សញ្ជាតិអង់គ្លេស ហាក់មិនគិតដល់ផ្លូវចាកចេញ ដ្បិតជាប់កុងត្រារយៈពេលយូរដល់ចុងខែមិថុនា ឆ្នាំ ២០២៨។
ខ្សែការពារ Ben Chilwell – ងាកមកកីឡាករសញ្ជាតិអង់គ្លេស គឺជាអ្នកទីបីដែលបន្តនៅ ហើយក៏ពុំមានចចាមអារ៉ាមផ្ទេរទៅក្លឹបដទៃណាមួយនោះដែរ។
ខ្សែបម្រើ N’Golo Kante – ជាកីឡាករកាន់ឆ្នាំមួយរូបផ្សេងទៀត បានចាកចេញពី Stamford Bridge ហើយទើបតែសម្រេចការផ្ទេរ ទៅកើបលុយធំនៅក្លឹបអារ៉ាប៊ីសាអូឌីត Al-Ittihad ជាក្លឹបប្រជែងនឹងមិត្តចាស់ Mendy។
ខ្សែបម្រើ Jorginho – នេះក៏ជាខាតបង់ធំមួយដែររបស់ Chelsea ដោយត្រង់យក Jorginho ចាយលុយអស់ ៥៧ លាន ដល់ត្រូវលក់ទៅវិញនៅពាក់កណ្តាលរដូវកាលឆ្នាំ ២០២៣ ឲ្យ Arsenal បានតែជាង ១១ លានប៉ុណ្ណោះ។
ខ្សែបម្រើ Mason Mount – ក្រោយមិនរាប់ចូលផែនការណ៍រដូវកាលថ្មី លោក Mauricio Pochettino ក៏សម្រេចលក់ Mount ទៅឲ្យ United ឥតស្ទាក់ស្ទើរ ហើយគេជាកីឡាករតែមួយរូបគត់ ក្នុងចំណោមការផ្ទេរទាំងអស់ដែល Chelsea ចំណេញ ត្រង់ងើបចេញពីថ្នាលគ្មានតម្លៃខ្លួន ឥឡូវលក់បានលុយ ៦៥ លានអឺរ៉ូត្រលប់មកវិញ។
ខ្សែប្រយុទ្ធ Kai Havertz – ទើបតែរបូតថ្មីថ្មោងឲ្យទៅក្លឹប Arsenal មួយរូបផ្សេងទៀត តែការផ្ទេរសារនេះ Chelsea អត់សូវខាតទេ ពោលយកចូល ៨០ លាន លក់ចេញទៅវិញក៏បាន ៧០ លានអឺរ៉ូត្រលប់មកវិញដែរ។
ខ្សែប្រយុទ្ធ Timo Werner – នេះក៏ជាការខាតបង់និងឈឺចាប់បំផុតផងដែរ ត្រង់យកមកជាង ៥០ លាន តែ Werner បែរមិនជាសម្របខ្លួនបានល្អ ដល់តែវិលចូល RB Leipzig បែរអាចធ្វើបានល្អទៅវិញ។ បច្ចុប្បន្នគេកំពុងឈរជើងឲ្យអតីតក្លឹបចាស់ ជាមួយអនុស្សារកាន់ពានអឺរ៉ុបមួយសម័យកាលនៅតោខៀវ៕
