លោកប្រធានាធិបតីហ្វីលីពីន Ferdinand Marcos Jr រំពឹងក្រុមអត្តពលិកជម្រើសជាតិហ្វីលីពីនឈ្នះមេដាយបំបែកកំណត់ត្រាចាស់នៅពេលចូលរួមប្រកួតកីឡាស៊ីហ្គេម លើកទី៣២ ឆ្នាំ២០២៣ នៅប្រទេសកម្ពុជា។
ក្នុងពេលចុះជួបអត្តពលិក និងប្រតិភូកីឡាហ្វីលីពីកាលពីថ្ងៃទី២៤ ខែមេសា លោក Marcos បាននិយាយថា លោកសូមអរគុណដល់អ្នកទាំងអស់គ្នាដែលនាំមកនូវភាពរុងរឿង និងកិត្តិយសជូនជាតិកន្លងមក។ ឥឡូវនេះ អ្នកទាំងអស់គ្នាត្រូវទៅចូលរួមប្រកួតស៊ីហ្គេម នៅប្រទេសកម្ពុជា ហើយអ្នកទាំងអស់គ្នាទំនងជាត្រៀមខ្លួនរួចរាល់។
លោកបាននិយាយថា ៖«បងប្អូនមានប្រជាជន១០៧លាននាក់ដែលនៅពីក្រោយ គិតគូ និងលើកទឹកចិត្តដល់អ្នកទាំងអស់គ្នាដើម្បីឲ្យមានកម្លាំងចិត្តក្នុងការទទួលបានជ័យជម្នះជូនជាតិ»។
«ខ្ញុំដឹងថា អ្នកទាំងអស់គ្នាខិតខំប្រឹងប្រែងហ្វឹកហាត់ខ្លាំងណាស់ ហើយប្រហែលជាមិនត្រឹមតែទទួលបានមកវិញត្រឹមតែមេដាយ និងពានរង្វាន់ប៉ុណ្ណោះទេ ប៉ុន្តែយើងប្រហែលជាបំបែកកំណត់ត្រាចាស់របស់យើង»។ លោក Marcos បាននិយាយ។
កាលស៊ីហ្គេម លើកទី៣០ ឆ្នាំ២០១៩ ហ្វីលីពីនក្នុងនាមជាម្ចាស់ផ្ទះឈរលើកំពូលតារាងមេដាយដោយឈ្នះបានមេដាយមាស១៤៩គ្រឿង ប្រាក់១១៧គ្រឿង និងសំរឹទ្ធ១២១គ្រឿង ខណៈស៊ីហ្គេម លើកទី៣១នៅវៀតណាមកាលពីឆ្នាំ២០២២កន្លងទៅនេះ ហ្វីលីពីនឈ្នះបានមេដាយមាស៥២គ្រឿង ប្រាក់៧០គ្រឿង និងសំរឹទ្ធ១០៥គ្រឿង។
សម្រាប់ស៊ីហ្គេម លើកទី៣២ នៅកម្ពុជាចាប់ពីថ្ងៃទី៥ ដល់ទី១៧ ខែមេសា ហ្វីលីពីននឹងបញ្ជូនអត្តពលិកប្រកួតទាំង៣៨ប្រភេទកីឡាដែលមានជាង៦០០វិញ្ញាសា៕ព័ត៌មានកីឡាបាល់ទាត់ថ្មីៗ
