ប៉ូលិស បារាំង កំពុង ឆែកឆេរ ទីស្នាក់ការ របស់ អ្នក រៀបចំ ការ ប្រកួត កីឡា អូឡាំពិក ទីក្រុង ប៉ារីស ឆ្នាំ២០២៤។ ក្រុមមន្ត្រីនិយាយថា ការវាយឆ្មក់នេះគឺជាផ្នែកមួយនៃការស៊ើបអង្កេតបឋមចំនួនពីរ។ សារព័ត៌មាន BBC បានផ្សាយ ថា ប៉ូលិស កំពុង ពិនិត្យ មើល ការចោទ ប្រកាន់ ពី ការ អនុគ្រោះ និង ការ ប្រើ ប្រាស់ លុយ សាធារណៈ ខុស ក្នុង ការ កំណត់ កិច្ចសន្យា សាងសង់។
អ្នកនាំពាក្យនៃគណៈកម្មាធិការរៀបចំទីក្រុងប៉ារីសឆ្នាំ២០២៤ បានប្រាប់ BBC ថា ស្ថាប័ននេះកំពុងសហការយ៉ាងពេញលេញជាមួយអ្នកស៊ើបអង្កេត។ កាលពីថ្ងៃអង្គារ អ្នកស៊ើបអង្កេតប្រឆាំងអំពើពុករលួយបានមកដល់ដោយមិនបានប្រកាសនៅឯទីស្នាក់ការកណ្តាលនៃគណៈកម្មាធិការរៀបចំកីឡាអូឡាំពិកនៅទីក្រុង Saint-Denis ជាយក្រុងប៉ារីស ក៏ដូចជានៅការិយាល័យរបស់ Solideo ដែលជាស្ថាប័នសាធារណៈទទួលបន្ទុកគម្រោងសាងសង់សម្រាប់ព្រឹត្តិការណ៍នេះ។
ស្ថាប័នតុលាការបារាំងដែលទទួលខុសត្រូវក្នុងការតាមដានឧក្រិដ្ឋកម្មហិរញ្ញវត្ថុ PNF ក្រោយមកបានបញ្ជាក់ថា ការស្វែងរករបស់ពួកគេកំពុងត្រូវបានអនុវត្តនៅទូទាំងទីតាំងជាច្រើនដែលពាក់ព័ន្ធនឹងអង្គការទាំង២។ ការវាយឆ្មក់របស់ប៉ូលីសកាលពីថ្ងៃអង្គារគឺជាវគ្គចុងក្រោយដែលប៉ះពាល់ដល់ចលនាអូឡាំពិក និងកីឡារបស់ប្រទេសបារាំងជាទូទៅក្នុងប៉ុន្មានខែថ្មីៗនេះ។
កាលពីខែឧសភា ប្រធានគណៈកម្មាធិការជាតិអូឡាំពិករបស់ប្រទេសបារាំង លោកស្រី Brigitte Henriques បានលាលែងពីតំណែងក្នុងការផ្លាស់ប្តូរមួយដែលធ្វើឱ្យអ្នកជំនាញកីឡាជាច្រើនមានការភ្ញាក់ផ្អើល។ មិនមានហេតុផលណាមួយត្រូវបានផ្តល់ឱ្យសម្រាប់ការសម្រេចចិត្តរបស់លោកស្រី Henriques នោះទេ ប៉ុន្តែវាបានកើតមានឡើងចំពេលមានរបាយការណ៍អំពីការប៉ះទង្គិចគ្នាយ៉ាងខ្លាំងនៅក្នុងអង្គការ។
កាលពីដើមឆ្នាំនេះប្រធានសហព័ន្ធបាល់ទាត់ និងបាល់ឱបរបស់ប្រទេសបារាំងបានឈប់ឈរឈ្មោះ បន្ទាប់ពីមានរឿងអាស្រូវដ៏ល្បី។សម្រាប់ត្តិការណ៍អូឡាំពិកឆ្នាំ២០២៤ នឹងប្រព្រឹត្តទៅចាប់ពីថ្ងៃទី២៦ ខែកក្កដាដល់ថ្ងៃទី១១ ខែសីហា ដោយកីឡាប៉ារ៉ាឡាំពិកដំណើរការនៅខែកញ្ញា ៕ព័ត៌មានកីឡាបាល់ទាត់ថ្មីៗ
