រដូវកាលទូទាំងលីគកំពូលទាំង ៥ ត្រូវបានបញ្ចប់សព្វគ្រប់ នេះទាំងសម្រាប់បណ្តាកីឡាករ ក៏អស់ភារកិច្ចជាមួយជម្រើសជាតិផងដែរ បន្ទាប់ទើបតែបញ្ចប់ការលេងពានរង្វាន់នានាដូចវគ្គជម្រុះបឋម EURO, Nations League និងប្រកួតមិត្តភាពមួយចំនួនផ្សេងទៀត។ព័ត៌មានកីឡាបាល់ទាត់ថ្មីៗ
ពួកគេទទួលបានពេលវេលាសម្រាកជិតមួយខែ មុនវិលត្រលប់ទៅហ្វឹកហាត់ឲ្យក្លឹបជាថ្មី សម្រាប់ប្រកួតត្រៀមបើករដូវកាល ២០២៣/២៤។ យ៉ាងណា PEAK Sports សូមធ្វើការបិទបញ្ជីសរុបគ្រាប់បាល់នារដូវកាលចាស់សិន ដោយអ្នកទាំង ១០ មានដូចជា៖
១០) Karim Benzema – ជាមួយភារកិច្ចនៅរដូវកាលចុងក្រោយឲ្យ Real Madrid សម្រាប់កីឡាករបារាំង រកបាន ៣១ គ្រាប់ មុនការផ្ទេរចេញទៅក្លឹបនៅដីអារ៉ាប៊ីសាអូឌីត គឺ Al-Ittihad។ ចំពោះគ្រាប់បាល់នៅជម្រើសជាតិ មិនមាននោះទេ ដ្បិតកីឡាករបានចូលនិវត្តតាំងចុងឆ្នាំទៅ ក្រោយចប់ World Cup។
៩) Alexandre Lacazette – កាលនៅ Arsenal រាងធ្លាក់ទម្រង់ ដល់វង់ចូលក្លឹប Lyon ជាថ្មី បែរកីឡាករបារាំងធ្វើបានល្អមិនគួរឲ្យជឿ នេះរកបាន ៣១ គ្រាប់ ខណៈការលេងឲ្យជម្រើសជាតិ មិនទាន់ត្រលប់មកវិញនៅឡើយ។
៨) Victor Osimhen – សេះខ្មៅនីហ្សេរីយ៉ា បានបង្កើតផ្លែផ្កាល្អណាស់ជាមួយ Napoli នៅរដូវកាលទើបតែបញ្ចប់ ជាមួយសមិទ្ធផលធំ លើកពាន Serie A ងាកមកតួលេខគ្រាប់បាល់មានដល់ ៣៣ គ្រាប់ រាប់ទាំង ២ គ្រាប់ធ្វើបានឲ្យជម្រើសជាតិ។
៧) Marcus Rashford – ដូចបានឃើញកីឡាករអង់គ្លេស ឡើងកូដខ្លាំងជាមួយ Man United នាពេលចុងក្រោយ សរុបគេរកបាន ៣៤ គ្រាប់ ដោយ ៣០ ធ្វើបាននៅបិសាចក្រហម និង ៤ គ្រាប់ធ្វើបានឲ្យតោកំណាច។
៦) Mohamed Salah – បើទោះបី Liverpool មិនទទួលបានលទ្ធផលល្អក្នុងលីគ តែគ្រាប់បាល់របស់កីឡាករអេហ្សីបនៅបន្តកើតឡើងយ៉ាងសកម្មដដែល នេះសរុបចូល ៣០ គ្រាប់ បូក ៤ គ្រាប់បន្ថែមទៀតឲ្យជម្រើសជាតិអេហ្សីប។
៥) Robert Lewandowski – ទៅលើកពាន La Liga នៅរដូវកាលដំបូង ជាមួយទ្រនំថ្មីអ្នកមានបុណ្យ រួចអតីតសមាជិកក្លឹប Bayern ក៏រកបាន ៣៣ គ្រាប់នៅទីនោះ បូក ៣ គ្រាប់បន្ថែមឲ្យប៉ូឡូញ ស្មើនឹង ៣៦ គ្រាប់។
៤) Lionel Messi – មុនការចាកចេញពីលីគកំពូលអឺរ៉ុប ក៏តារាឆ្នើមអាហ្សង់ទីនបានបន្សល់តួលេខគ្រាប់បាល់ក្រាស់ក្រែលផងដែរ នេះសរុប ៣៨ គ្រាប់ មាន ២១ នៅ PSG និង ១៧ នៅជម្រើសជាតិអាហ្សង់ទីន។
៣) Harry Kane – បើអត់ Haaland ម្ល៉េះ Kane ឈ្នះពានស្បែកជើងមាសនៅ PL បាត់ហើយ នេះរកបានដល់ ៣២ គ្រាប់ឲ្យ Spurs បូក ៨ គ្រាប់ឲ្យតោកំណាច សរុបបិទបញ្ជីរដូវកាលគឺ ៤០ គ្រាប់។
២) Kylian Mbappe – ធ្វើបានសរុបដល់ ៥៤ គ្រាប់ឯណោះ មាន ៤១ គ្រាប់ឲ្យក្លឹប Paris Saint-Germain និង ១៣ គ្រាប់នៅជម្រើសជាតិមាន់គកបារាំង។
១) Erling Haaland – មនុស្សយន្តត្រូវបានគេសរសើរជោកជាំ ក្រោយផ្ទេរមកក្លឹបមេឃខៀវ Man City។ នេះទើបតែរដូវកាលដំបូង កីឡាករន័រវេសរកបានដល់ ៥៦ គ្រាប់សរុប ទាំងក្លឹបបូកជម្រើសជាតិ។
ជាការឆ្លើយតបពីក្លឹបក៏លេចលឺថា ម្ចាស់ដី Etihad បានរៀបចំកាដូប្រាក់ឈ្នួលថ្មី សម្រាប់កីឡាករវ័យ ២៣ ឆ្នាំជាពិសេសផងដែរ ពោលគ្រោងផ្តល់ជូន ៨៦៥ ០០០ ផោន/សប្តាហ៍ ជាតួលេខខ្ពស់ដាច់គេមិនធ្លាប់មានក្នុងប្រវត្តិសាស្រ្តក្របខ័ណ្ឌ Premier League៕
