(ស៊ីហ្គេម)៖ ខណៈដែលកីឡាមួយចំនួនត្រូវបើកការប្រកួតមុនពិធីបើកនៅថ្ងៃទី៥ ខែឧសភា ឆ្នាំ២០២៣ គិតត្រឹមថ្ងៃទី៣ ខែឧសភានេះ ការប្រកួតកីឡាស៊ីហ្គេម លើកទី៣២ បន្តដំណើរការ ដោយម្ចាស់ផ្ទះកម្ពុជា មានវត្តមានក្នុងការប្រកួតវិញ្ញាសាជាច្រើន ក្នុងនោះមានបាល់ទាត់នារី និងបាល់ទះបុរស ផងដែរ…។
ការប្រកួតបាល់ទាត់ផ្នែកនារីកម្ពុជា ដែលស្ថិតនៅក្នុងពូលB បើកទ្វារទទួលក្រុមភ្ញៀវឡាវ ក្នុងការប្រកួតលើកដំបូងរបស់ខ្លួន នាវេលាម៉ោង៨យប់ នៅកីឡដ្ឋានស្មាត អ.អេស.អិន។ ការបើកទ្វារទទួលក្រុមភ្ញៀវនេះ ក្រោយការតទល់គ្នារវាងថៃ និងសិង្ហបុរីជាគូបើកឆាកមុន។ រីឯជំនួបពូលA រៀបចំនៅកីឡដ្ឋានកងយោធពលខេមរភូមិន្ទ។ សម្រាប់បាល់ទាត់បុរសវិញ បណ្តាក្រុមនៅពូលB បន្តដំណើរការប្រកួតរបស់ខ្លួននៅកីឡដ្ឋានព្រីនស៍ ចាប់ពីម៉ោង៤រសៀលតទៅ។
ដោយឡែក ក្រុមកីឡាបាល់ទះជម្រើសជាតិកម្ពុជា ត្រូវបើកការប្រកួតរបស់ខ្លួន ដោយស្វាគមន៍ក្រុមសិង្ហបុរី សម្រាប់វគ្គចែកពូលនាវេលាម៉ោង៧យប់ នៅពហុកីឡដ្ឋានជាតិអូឡាំពិក ដែលមានការប្រកួតរវាង ម៉ាឡេស៊ី និងថៃ, ហ្វីលីពីន និងឥណ្ឌូណេស៊ី, មីយ៉ាន់ម៉ា និងវៀតណាម ដែលចាប់ផ្តើមពីម៉ោង១២ថ្ងៃត្រង់។
មុនជំនួបគ្នានៅស៊ីហ្គេម ក្រុមបាល់ទះជម្រើសជាតិកម្ពុជា ធ្លាប់បានយកឈ្នះក្រុមភ្ញៀវសិង្ហបុរី ២-១ សិត នាជំនួបមិត្តភាពអន្តរជាតិ កាលថ្ងៃទី១៥ ខែតុលា នៅទីលានបាល់ទះក្នុងសាលព្រីនស៍(ហ្គ្រែនភ្នំពេញ)។ ចំពោះការប្រកួតពានរង្វាន់បាល់ទះ Tri-Nation Volleyball Cub 2023 នៅទីលាន MBSA Indoor Volleyball Hall ក្នុងក្រុងកូឡាឡាំពួ ប្រទេសម៉ាឡេស៊ី កាលពីថ្ងៃទី៣០ ខែមីនា ក្រុមជម្រើសជាតិបាល់ទះកម្ពុជា បានយកឈ្នះក្រុមសិង្ហបុរីដោយលទ្ធផល ៣-១សិត។
ក្រុមកីឡាករហុកគីកម្ពុជា នឹងបន្តជួបក្រុមថៃនៅវេលាម៉ោង៤ៈ៤៥នាទី រសៀលនៅទីលានសួន ដាយណូស័រ (ជ្រោយចង្វារ) សម្រាប់វគ្គជម្រុះតាមពូល មុនពេលក្រុមនារីកម្ពុជា ស្វាគមន៍ក្រុមសិង្ហបុរី នាវេលាម៉ោង៦ល្ងាច។ កីឡាឧបសគ្គ ផ្តើមការប្រកួតជម្រុះនៅមជ្ឈមណ្ឌលជ្រោយចង្វា ដោយកម្ពុជាចូលរួមទាំងជាក្រុម និងឯកត្តជនបុរស-នារី។ ចំណែកកីឡាអុកចត្រង្គ ផ្តើមជម្រុះជុំទី១ លើវិញ្ញាសា១ទល់១ រយៈពេល៦០នាទី ទាំងបុរស និងនារី នៅសាកលវិទ្យាល័យភូមិន្ទភ្នំពេញ។ រីឯកីឡាទូកក្តោង បន្តការប្រកួតថ្ងៃទីពីររបស់ខ្លួននៅខេត្តព្រះសីហនុ ទាំងវិញ្ញាសាបុរស នារី និងចម្រុះ។ សម្រាប់កីឡាគ្រីឃីតវិញ ការប្រកួតប្រព្រឹត្តទៅនៅទីលាន AZ Group ផ្លូវ៦០ម៉ែត្រ ដោយផ្តើមរវាងជំនួបម៉ាឡេស៊ី និងថៃ សិង្ហបុរី និងហ្វីលីពីន…៕អានពត៌មានប្រចាំថ្ងៃ
