សហព័ន្ធកីទ្បាបាល់ទាត់ទ្វីបអាស៊ី (AFC) បានដាក់ពិន័យយ៉ាងធ្ងន់ធ្ងរលើក្រុមជម្រើសជាតិថៃ និងឥណ្ឌូណេស៊ី បន្ទាប់ពីវាយតបគ្នាអំទ្បុងពេលការប្រកួតវគ្គផ្តាច់ព្រ័ត្រ នៃវិញ្ញាសាបាល់ទាត់ផ្នែកបុរសអាយុក្រោម២២ឆ្នាំ ក្នុងព្រឹត្តិការណ៍ស៊ីហ្គេម លើកទី៣២ នៅប្រទេសកម្ពុជា…។
ជុំវិញការប៉ះទង្គិចខាងលើនេះ AFC បានធ្វើការពិន័យលើក្រុមកីទ្បាករថៃ២នាក់ និងក្រុមការងារគ្រូបង្វឹក៥នាក់ ហើយនិងកីទ្បាករឥណ្ឌូណេស៊ី៣នាក់ រួមជាមួយក្រុមការងារគ្រូបង្វឹក៤នាក់។ ក្នុងចំណោមពួកគេទាំងអស់នេះ នឹង ត្រូវពិន័យជាប្រាក់ម្នាក់១ពាន់ដុល្លារអាម៉េរិក និងហាមមិនចូលលេងចំនួន៦ប្រកួត។ បន្ថែលើនោះ សមាគមកីទ្បាបាល់ទាត់ថៃ (FAT) ក៏ត្រូវពិន័យប្រាក់១ម៉ឺនដុល្លារបន្ថែមទៀតផងដែរ។
គួររំលឹកផងដែរថា នៅវគ្គផ្តាច់ព្រ័ត្រស៊ីហ្គេម លើកទី៣២ ដែលប្រព្រឹត្តទៅនៅល្ងាចថ្ងៃទី១៦ ខែឧសភា ឆ្នាំ២០២៣ ក្រុមបាល់ទាត់ថៃ និងក្រុមឥណ្ឌូណេស៊ី បានប៉ះទង្គិចគ្នា២លើក នៅចុងតង់ទី២ និងនៅដើមម៉ោងបន្ថែមលើកទី១ បន្ទាប់ពីកីទ្បាករលេខ១៧របស់ឥណ្ឌូណេស៊ី បានទាត់បាល់បញ្ចូលទីមួយគ្រាប់នាំមុខជាថ្មីលើក្រុមថៃ(៣-២) ដែលជាហេតុធ្វើឱ្យថៃផ្ទុះកំហឹង ក៏មានការប្រវ៉ាយប្រតប់គ្នារវាងកីឡាករ និងកីឡាករ ហើយជាមួយគ្នានោះ គ្រូជំនួយក្រុមឥណ្ឌូណេស៊ីម្នាក់ ក៏ត្រូវបានខាងភាគីថៃ វាយឱ្យដេកដួលនៅលើទីលានរងរបួសធ្ងន់ធ្ងរផងដែរ។ ភ្លាមៗមន្ត្រីរក្សាសន្តិសុខនៃកងរាជអាវុធហត្ថកម្ពុជា បានចុះអន្តរាគមន៍ ដើម្បីបំបែកក្រុមជម្លោះ ខណៈលោកអាជ្ញាកណ្ដាលលើទីលាន បានចាយកាតក្រហមជាច្រើនសន្លឹកឱ្យទៅគូភាគីទំនាស់ផងដែរ។ព័ត៌មានកីឡាបាល់ទាត់ថ្មីៗ
យ៉ាងណា បន្ទាប់ពីប៉ះទង្គិចគ្នារួចហើយ សមាគមកីទ្បាបាល់ទាត់ថៃ (FAT) បានចេញមុខសុំទោលចំពោះឧប្បតិហេតុនេះ ដែលបានកើតឡើងធ្វើឱ្យខូចមុខមាត់ក្រុមបាល់ទាត់ថៃ ជាពិសេស បាល់ទាត់ក្នុងតំបន់ និងឆាកអន្តរជាតិជាដើម។ បន្ថែមពីនេះ FAT ក៏បានដាក់ពិន័យលើក្រុមកីទ្បាករ និងមន្រ្តីជាប់ពាក់ព័ន្ធរបស់ខ្លួនផងដែរ សម្រាប់បញ្ហាខាងលើ។ ជាក់ស្តែង មន្រ្តីជាប់ពាក់ព័ន្ធ៣នាក់ត្រូវបានហាមមិនឱ្យធ្វើការឱ្យក្រុមជម្រើសជាតិរយៈពេលមួយឆ្នាំ ហើយកីឡាករវ័យក្មេងពីរនាក់ ត្រូវបានហាមមិនឱ្យចូលរួមជម្រើសជាតិរយៈពេល៦ខែ៕
