(បាល់ទាត់)៖ ខ្សែបម្រើ គីម សុខយុទ្ធ របស់ក្លឹបព្រះខ័នរាជស្វាយរៀង ទំនងជាអាចនឹងអវត្តមានពេញ១រដូវកាលតែម្ដង សម្រាប់ការប្រកួតក្នុងក្របខណ្ឌលីគកំពូលកម្ពុជា Cambodia Premier League នារដូវកាលនេះ នោះក៏ព្រោះតែរូបគេរងរបួសបាក់កជើង..។
កីទ្បាករវ័យ២៤រូបនេះ បានរងរបួសបាក់កជើង អំទ្បុងពេលហ្វឹកហាត់ជាមួយក្រុមព្រះខ័នរាជស្វាយរៀង កាលពីថ្ងៃទី១៥ ខែវិច្ឆិកា ឆ្នាំ២០២៣ ដើម្បីត្រៀមខ្លួនក្នុងការប្រកួតជើងទី២ នៃក្របខណ្ឌលីគកំពូលកម្ពុជា CPL..។ យ៉ាងណា កាលពីល្ងាចថ្ងៃទី១៦ ខែវិច្ឆិកា ឆ្នាំ២០២៣ ខ្សែបម្រើ គីម សុខយុទ្ធ បានធ្វើការវះកាត់របួសនេះរួចហើយដែរ ប៉ុន្តែរូបគេក៏ត្រូវសម្រាកព្យាបាលក្នុងរយៈពេលវែងផងដែរ ដូច្នេះ សម្រាប់ គីម សុខយុទ្ធ ទំនងជាអាចខកខានជួយក្រុមព្រះខ័នរាជស្វាយរៀងពេញ១រដូវកាលតែម្ដង។ គួរឱ្យដឹងដែរថា ខ្សែបម្រើ គីម សុខយុទ្ធ បានរួមចំណែកយ៉ាងខ្លាំងក្នុងការជួយក្រុមព្រះខ័នរាជស្វាយរៀង រក្សាកំណត់ត្រាជាក្រុមមួយក្នុងលីគកម្ពុជាមិនទាន់ចាញ់សូម្បីតែម្ដងទ្បើយ។ បច្ចុប្បន្ន ក្រុមព្រះខ័នរាជស្វាយរៀង កំពុងឈរនៅលើកំពូលតារាងមាន៣០ពិន្ទុពេញ ស្របពេលក្រុមការពារតំណែងជើងឯកភ្នំពេញក្រោន ក៏ប្រដេញតាមពីក្រោយ៨ពិន្ទុផងដែរ។
ការប្រកួតសប្តាហ៍ទី១១ ជុំទី២ ខាងមុខក្រុមព្រះខ័នរាជស្វាយរៀង ដឹកនាំដោយលោកគ្រូ Pep Muñoz នឹងនាំកូនក្រុមរបស់ខ្លួនធ្វើដំណើរទៅកាន់រាជធានីភ្នំពេញ ដើម្បីសួរសុខទុក្ខក្រុមម្ចាស់ផ្ទះភ្នំពេញក្រោន ដែលដឹកនាំដោយបុរសខ្លាំងសញ្ជាតិអ៊ុយក្រែនវ័យ៣៧ ឆ្នាំលោក Oleg Starynskyi នៅឯកីទ្បដ្ឋាន Smart RSN នាថ្ងៃទី២៥ ខែវិច្ឆិកា ឆ្នាំ២០២៣..៕អានពត៌មានប្រចាំថ្ងៃ
