ក្លិប Real Madrid ត្រៀមទទួលសំណើពីក្លឹបអារ៉ាប៊ីសាអូឌីតសម្រាប់ខ្សែការពារបារាំង Ferland Mendy។ នេះបើយោងតាមការចុះផ្សាយរបស់សារព័ត៌មាន Onefootball
ក្លិបនៅក្របខណ្ឌ Saudi Pro League កំពុងបន្តដំណើរការជ្រើសរើសកីឡាករល្បីៗនៅរដូវក្តៅនេះ បន្ទាប់ពីក្រុមហ៊ុនមូលនិធិវិនិយោគសាធារណៈអារ៉ាប៊ីសាអូឌីត (Saudi Public Investment Fund) បានគ្រប់គ្រងក្លឹបក្នុងស្រុកចំនួនបួន ស្របពេលពួកគេមិនខ្លាចរអាក្នុងការជះលុយដ៏ច្រើនសន្ធឹកសន្ធាប់នាំយកកីឡាករឆ្នើមៗនោះទេ។
អតីតប្រធានក្រុម Real Madrid ខ្សែប្រយុទ្ធលំដាប់កំពូល Karim Benzema បានបញ្ចប់ការផ្លាស់ប្តូរទៅកាន់ក្លិបអ្នកមាន Al Ittihad គួរឱ្យភ្ញាក់ផ្អើលនៅក្នុងរដូវក្ដៅឆ្នាំ២០២៣នេះ ជាមួយប្រាក់ឈ្មួលខ្ពស់កប់ពពក ខណៈមិត្តរួមជាតិបារាំង Mendy ក៏អាចដើរតាមគន្លងខ្សែប្រយុទ្ធវ័យ ៣៥ឆ្នាំរូបនេះទៅលេងនៅតំបន់មជ្ឈឹមបូព៌ាផងដែរ។
Ferland Mendy បានបាត់បង់តួនាទីក្នុងជម្រើសដំបូងរបស់ក្លិប Real Madrid ក្រោមការដឹកនាំរបស់គ្រូបង្វឹកលោក Carlo Ancelotti ក្នុងរយៈពេល ១២ ខែចុងក្រោយនេះ ហើយក្លឹបអេស្ប៉ាញខាងលើក៏បានបើកការលក់ខ្សែការពារឆ្នើមរូបនេះផងដែរ ប្រសិនបើមានការផ្ដល់ជូនណាមួយសមរម្យបានដាក់ស្នើរមកកាន់ក្លិប។
លោក Ancelotti គ្មានបំណងបញ្ចេញកីឡាករអន្តរជាតិបារាំងវ័យ ២៨ឆ្នាំរូបនេះនោះទេ ប៉ុន្តែក្លិប Real Madrid នឹងស្តាប់ការផ្តល់ជូនណាមួយដែលអាចទទួលយកបាន នេះបើយោងតាមរបាយការណ៍ពីការសែត Diario AS ។ ការវិលត្រឡប់របស់ខ្សែការពារវ័យក្មេង Fran Garcia ទៅ Real Madrid វិញ នឹងនាំមកនូវសម្ពាធបន្ថែមទៀតលើតួនាទីរបស់ Mendy ជាមួយនឹង David Alaba ដែលកំពុងក្ដោបក្ដាប់តំណែងខ្សែការពារស្លាបឆ្វេងយ៉ាងពេញដៃ។
ជាមួយគ្នានេះ លក្ខខណ្ឌនៃការដោះលែង Mendy នៅ Real Madrid គឺមានតម្លៃខ្ពស់ខ្លាំងណាស់រហូតដល់ទៅ ២៥០ លានអឺរ៉ូ ប៉ុន្តែក្លឹបយក្សអេស្ប៉ាញអាចទទួលយកការផ្តល់ជូនប្រហែល ១០% នៃតម្លៃនោះ ប្រហាក់ប្រហែល ២០ ទៅ ៣០លានអឺរ៉ូប៉ុណ្ណោះ។ តែទោះជាយ៉ាងណា ការផ្ទេរអាចកើតឡើងឬក៏អត់នោះ យើងនៅមិនទាន់ដឹងនៅឡើយទេ មានតែរង់ចាំតាមដានទាំងអស់គ្នា៕ព័ត៌មានកីឡាបាល់ទាត់ថ្មីៗ
