បន្ទាប់ពីក្លឹបអារ៉ាប៊ីសាអូឌីតផ្តល់ជូន Karim benzema ២០០លានអឺរ៉ូសម្រាប់ពីររដូវកាល ការផ្តល់ជូននេះត្រូវបានគេគិតថាបានកើនឡើងទ្វេដងដល់ ៤០០លានអឺរ៉ូ ខណៈម្ចាស់ពាន Ballon d’Or ឆ្នាំ ២០២២ កាន់តែខិតជិតចាកចេញពី Real Madrid ។
អនាគតរបស់ Karim Benzema ជាមួយ Real Madrid កាន់តែជិតឈានដល់ទីបញ្ចប់ ខណៈកុងត្រារបស់គាត់នឹងផុតកំណត់នៅខែមិថុនា ពោលគឺនៅខែក្រោយនេះ។ បើទោះបីជាមានលក្ខខណ្ឌបន្តដោយស្វ័យប្រវត្តិមួយឆ្នាំទៀត នៅក្នុងកិច្ចសន្យារបស់គាត់ក៏ដោយ ប៉ុន្តែម្ចាស់ពាន Ballon d’Or និងក្លឹបមិនទាន់បានប្រកាសនៅឡើយនោះទេ។
ថ្មីៗនេះដែលចេញផ្សាយដោយការសែត ‘Relevo’ ដែល MerlPlus បានដកស្រង់ផងដែរនោះ បានរាយការណ៍ពីការផ្តល់ជូន ២០០លានអឺរ៉ូពីភាគីអារ៉ាប៊ីសាអូឌីត សម្រាប់តារា Real Madrid ដែលនឹងធ្វើឱ្យគាត់រកបាន ១០០ លានអឺរ៉ូក្នុងមួយឆ្នាំ ជាមួយសុពលភាពចំនួនពីររដូវកាលនៅលើទឹកដីទ្វីបអាស៊ី។
ប៉ុន្តែក្ដៅៗនេះការសែត ‘AS’ បានអះអាងថា តួលេខផ្ដល់ជូនខាងលើនេះត្រូវបានកើនឡើងទ្វេដងឯណោះ។ ក្លឹបដែលមិនទាន់បញ្ចេញឈ្មោះត្រូវបានគេទម្លាយថា បានសន្យាជាមួយនឹងម្ចាស់អាវលេខ៩ ក្នុងកិច្ចសន្យាដែលកើនឡើងដល់ទៅ ៤០០លានអឺរ៉ូសម្រាប់រយៈពេល ២ រដូវកាល ក៏រួមជាមួយតួនាទីជាទូតសុឆន្ទៈ សម្រាប់ការប្រកួតបាល់ទាត់ពិភពលោក World Cup ឆ្នាំ២០៣០ផងដែរ។
ប្រភពខាងលើក៏បានបន្ថែមទៀតថា ខ្សែប្រយុទ្ធបារាំង Karim Benzema នឹងចាកចេញពីក្លឹប Real Madrid នៅរដូវក្តៅនេះហើយ បន្ទាប់ពីចូលរួមជាមួយក្លិបយក្សអេស្ប៉ាញអស់រយៈពេលជាង ១៥ ឆ្នាំ ដែលធ្វើឱ្យគាត់ឈ្នះពានរង្វាន់ជាច្រើននៅទីនោះ។
សូមឱ្យដឹងផងដែរថា Karim Benzema បានបង្ហាញខ្លួនចំនួន ៦៤៧ ប្រកួតដោយស៊ុតបញ្ចូលទីចំនួន ៣៥៣ គ្រាប់ និង ១៦៥ Assists។ ក្នុងនោះគាត់បានឈ្នះពានរង្វាន់ជាច្រើនដូចជា LaLiga ៤ដង, Champions League ៥ដង, Copa del Rey ៣ដង, Supercopa de España ៣ដង, UEFA Super Cup ៤ ដង, Club World Cup ៥ដង និងឈ្នះពានបុគ្គល Ballon d’Or ឆ្នាំ២០២២ផងដែរ៕ព័ត៌មានកីឡាបាល់ទាត់ថ្មីៗ
