ស្ទើរមិនគួរឱ្យជឿសោះ! កុងត្រាថ្មីរបស់ខ្សែប្រយុទ្ធអង់គ្លេស Marcus Rashford ជាមួយក្លឹបបិសាចក្រហម Manchester United មានតម្លៃរហូតដល់៣៧៥០០០ផោន ក្នុងមួយសប្តាហ៍ ខណៈដែលកិច្ចសន្យាមានសុពលភាពរហូតដល់ឆ្នាំ២០២៨ឯណោះ ប៉ុន្តែកិច្ចព្រមព្រៀងនេះកំពុងស្ថិតនៅដំណាក់កាលចុងក្រោយ នៃការចរចានៅឡើយ។
យ៉ាងណា ប្រសិនបើ Marcus Rashford យល់ព្រមលើសំណើខាងលើនេះមែនទែននោះ រូបគេនឹងក្លាយជាកីទ្បាករមានតម្លៃថ្លៃនឿយហត់ច្រើនជាងគេបង្អស់ស្មើគ្នានឹងអ្នកចាំទី David de Gea ដែលទើបតែចាកចេញពីកីទ្បដ្ឋាន Old Trafford កាលពីកន្លងទៅថ្មីៗនេះ។ David de Gea បានចាកចេញពីក្លឹប Manchester United ក្រោយកិច្ចសន្យាអស់សុពលភាពត្រឹមខែមិថុនា ឆ្នាំ២០២៣។ ការចាកចេញរបស់ David de Gea ពីក្រុម United ត្រូវបានគេជឿជាក់ ១០០ភាគរយថា អ្នកចាំទី André Onana នឹងចូលមកជំនួសតួនាទីនារដូវកាលថ្មីខាងមុខ។ព័ត៌មានកីឡាបាល់ទាត់ថ្មីៗ
កិច្ចសន្យារបស់ Marcus Rashford នឹងអស់សុពលភាពជាមួយនឹងក្រុម United នៅឆ្នាំ២០២៤ ខាងមុខ ប៉ុន្តែតាមការសង្កេតមើលឃើញរបស់គ្រូបង្វឹកថ្មី លោក Erik Ten Hag កាលពីរដូវកាលមុនបានយល់ឃើញថា Rashford មានទម្រង់លេងបានយ៉ាងល្អប្រសើរ បន្ទាប់ពីរកបាន៣០គ្រាប់ឱ្យក្រុម និងរួមចំណែកជួយឱ្យក្រុមឈ្នះពានរង្វាន់ Carabao Cup និងត្រលប់មកលេងក្របខណ្ឌ Champions League នារដូវកាលថ្មីនេះ។ កាលពីរដូវកាលមុន Marcus Rashford ទទួលបានថ្លៃនឿយហត់ប្រមាណជាង ២០០០០០ផោន ប៉ុណ្ណោះក្នុងមួយសប្តាហ៍។ ដូច្នេះ ប្រសិនបើអ្វីៗដំណើរការនោះគ្រប់យ៉ាងជារឿងល្អសម្រាប់អនាគតរបស់គេនៅឯ Old Trafford។
សូមបញ្ជាក់ថា Marcus Rashford ដែលមានវ័យ២៥ឆ្នាំរូបនេះ ត្រូវគេកក់សម្គាល់ឃើញថាបានច្រានចោលនូវសំណើក្រុមផ្សេងៗពីប្រទេសអង់គ្លេស និងក្រៅប្រទេសដើម្បីបន្តស្នាក់នៅក្លឹប Manchester United៕
